རྒྱ་ནག་གིས་ངོས་འཛིན་བྱས་པའི་པཎ་ཆེན་ལ་གོ་གནས་སྤྲད་འདུག

ཟླ་འདིའི་ཚེས་༡ ཉིན་ནས་རྒྱ་ནག་གི་རྒྱལ་ས་པེ་ཅིང་དུ་ཀྲུང་གོའི་ནང་བསྟན་མཐུན་ཚོགས་ཀྱི་རྒྱལ་ཡོངས་ཚོགས་ཆེན་ཐེངས་བརྒྱད་པ་ཞེས་པ་འཚོགས་ཤིང། ཚེས་༣ ཉིན་རྒྱ་གཞུང་གིས་ངོས་བཟུང་བའི་པཎ་ཆེན་ལ་ཀྲུང་གོའི་ནང་བསྟན་མཐུན་ཚོགས་ཞེས་པའི་ཚོགས་གཙོ་གཞོན་པར་བསྐོ་བཞག་བྱས་ཡོད་པ་རེད།
ཚོགས་འདུ་དེར་ཀྲུང་དབྱང་འཐབ་ཕྱོགས་གཅིག་གྱུར་ཁང་གི་རྒྱུན་ལས་ཚོགས་གཙོ་གཞོན་པ་ཀྲུང་ཝེ་ཆོན་དང། རྒྱལ་ཡོངས་སྲིད་གྲོས་ཀྱི་ཚོགས་གཙོ་གཞོན་པ་ལྷག་པ་ཕུན་ཚོགས་དང། རྒྱ་ནག་ཏའོ་ཅའོ་ཆོས་ལུགས་མཐུན་ཚོགས་ཀྱི་ཚོགས་གཙོ་རེན་ཧྥ་རུང་། རྒྱ་ནག་ཁ་ཆེའི་ཆོས་ལུགས་མཐུན་ཚོགས་ཀྱི་ཚོགས་གཙོ་ཁྲེང་ཀོང་ཡོན། རྒྱ་ནག་གི་ཡེ་ཤུའི་གནམ་བདག་ཆོས་ལུགས་རྒྱལ་གཅེས་མཐུན་ཚོགས་ཀྱི་ཚོགས་གཙོ་གཞོན་པ་ལིའུ་པའོ་ཉན་དང་རྒྱ་ནག་གི་ཡེ་ཤུ་ཆོས་ལུགས་མཐུན་ཚོགས་ཀྱི་ཚོགས་གཙོ་གཞོན་པ་ཐང་ཝེ་མེན་བཅས་གྲོས་ཚོགས་དེར་ཞུགས་ཡོད་འདུག
ཚོགས་འདུ་དེའི་སྐབས་སུ་ཀྲུང་གོའི་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་འཇམ་དབྱངས་བློ་བཟང་འཇིགས་མེད་ཐུབ་བསྟན་ཆོས་ཀྱི་ཉི་མ་སྤྲུལ་སྐུས་གཙོ་སྐྱོང་དང། ཀྲུང་གོའི་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་དང་ཆོས་དཔོན་ཧྲིན་ཧའེ་ཡིས་གྲོས་ཚོགས་འགོ་ཚུགས་པའི་ཤིས་ཚིག་ཕུལ་བ་དང། ཀྲུང་གོའི་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་དང་ཆོས་དཔོན་ཞའོ་ཁྲེང་གིས་ཀྲུང་གོའི་ནང་བསྟན་མཐུན་ཚོགས་སྐབས་བདུན་པའི་རྒྱུན་ལས་ཚོགས་པའི་ཚབ་བྱས་ནས་ལས་དོན་སྙན་ཞུ་ཕུལ་གནང་ཞིང་། ཀྲུང་གོའི་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་དང་དགེ་བསྙེན་ཏའོ་ཧྲུའུ་ཡིས་《ཀྲུང་གོའི་ནང་བསྟན་མཐུན་ཚོགས་ཀྱི་སྒྲིག་རིམ》ཞེས་པ་ལེགས་བཅོས་བྱས་པའི་སྐོར་གསལ་བཤད་བྱས་འདུག དེ་ལས་མང་། »