ས་སྲོད་ཀྱི་སྒྲོན་ངོགས་ནས།
རང་བྱུང་གིས་བརྡོལ་བའི་ཆུ་མིག་འདིའི་སྐད་ཆ།
སུ་ཞིག་གི་སེམས་ངོགས་སུ་གླན་ཆོག་ན།
དྭངས་གཙང་དྭངས་གཙང་གི
རྩྭ་ལྗོན་གྱི་ནེམ་ལོ།
སྐྱེད་ཚལ་གྱི་མེ་ཏོག་ལྟར་འཕྱུར་ངེས།

རླབས་ཕྲེང་དེ།
ཁེར་རྐྱང་གིས་འཕྱོ་དུས།
མེ་ཏོག་གི་ཟིལ་བས།
མཚོ་འགྲམ་གྱི་བྱེ་སྤངས་བརླན།
ག་ལེར།
ཕྱི་རོལ་ཏུ་ཆས་ན།
མལ་སའི་གྲང་རླུང་ ལྟ་ བུའི།
ཁུ་སིམ་སིམ་གྱི་མཚན་མོ་འདི།
སུ་ཞིག་གི་འཆར་བཀོད་ནང་བཞིན།
ངའི་སྐྱོ་གདུང་གི་སྣོན་མར་འོངས།

དྲ་ངོས་ལས་ལག་པས་སྐད་ཆ་བཤད་དུས།
མེ་ཏོག་དང་སྒྲོལ་མའི་སེམས་པ།
རྒྱང་རིང་རྒྱང་རིང་ན་ཡོད།
བར་ཐག་འདི།
ང་དང་ཁོ་མོ་གཉིས་ཀྱི་བར་ཐག་འདི།
སྐུད་མེད་ཀྱི་ཏར་ལམ་ནས་མཐུད་ཡང་།
ལེ་དབར་ཁྲི་ཕྲག་གི་རི་ཆུ་འདིས་ཆོད་སོང་།

ཅེར་གྱིས་བལྟས་ན།
སྣང་བ ་མངོན་སུམ་གྱིས་འཛུམ་ཡང་།
ལྷོད་ཀྱིས་ལྟོས་ན།
ན་ཟུག་གི་གྲངས་ཀ་འཕེལ་འགྲོ།
ལས་དབང་འདི་དང་།
ལན་ཆགས་དེ།
དོ་དགོང་གི་ནམ་ཚ་ཡིན།