(ཁྱོད་རང་ནམ་ཡང་ཕྱིར་ལོག་མི་ཉན། ས་ཆ་དེ་གར་གཏན་སྡོད་བྱེད་རོགས། ཞེས་ ༢༠༠༩ ཟླ་ ༢ ཚེས་ ༡༠ ཉིན་མི་གཤིས་ཟོལ་བྲལ་གྱི་ཨ་ཕའི་ཞལ་ཆེམས་འབྱོར་རྗེས།)

ཀ
དུས་རབས་ཀྱི་འཐོར་རླུང་རྩུབ་མོས་ས་སྒང་གི་རྨི་ལམ་བསིལ་བུར་གཏོར་བའི་མཚན་ལྗོངས་རིང་མོ་དེའི་འགྱུར་ཁུག་ཁྲོད། ཁོ་བོའི་ལས་དབང་གི་རྣམ་ཤེས་ཕྲ་མོའི་འབོད་པ་སྙི་མོས། ཨ་ཕ་ལགས། ཁྱེད་རང་ཆེས་མཐའ་མའི་གཤགས་བཅོས་ཀྱི་སྟེགས་བུ་ལས་བསྐྱར་དུ་མི་ཡུལ་ལ་ལོག་པའི་སྟེས་དབང་གི་རྒྱལ་ཁ་དཀར་པོ། ཁྱིམ་གཞིས་ཆུང་ཆུང་དེའི་བླ་སྲོག་གི་མེ་ལྕེ་སྦོར་བའི་ལྷ་ཡི་དཔལ་འབར་དུ་གྱུར་པའི་རིན་ཐང་བྲལ་བའི་ལོ་རྒྱུས་ཀྱི་ལ་གླུ་སྙན་མོ་དེ་བཞིན། དུས་རབས་ཕྱེད་ཡོལ་གྱི་བྱ་ལམ་བཅད་
པའི་དོ་ནུབ་ཀྱང༌། སྲིད་པ་ཆགས་གླུའི་ངག་སྒྲུང་ལྟར། འུ་ཚང་གི་ཁྱིམ་མི་རེ་རེའི་མགྲིན་པའི་དབྱངས་རྟར་འཁྱུད་པ་ཁྱེད་ཀྱིས་གསན་པ་ཨེ་བྱུང༌།
ཁ།
ཤིན་ཏུ་ཉམ་ཆུང་ཞིང༌། དམར་ཁྲག་དང་ལྗན་ལྗིན་གྱིས་སྦགས་པའི་ཁོ་བོའི་སྒྱུ་ལུས་རྡོག་པོ་མཐོང་ཐེངས་དང་པོར། ཁྱེད་རང་དགའ་སྤྲོ་དང༌། རེ་འདུན་ཁྲི་ཕྲག་དུ་མའི་མཚོ་ཀློང་དུ་གཡེངས་ནས། དུས་ཚོད་ཀྱི་ཚག་སྒྲ་ཅི་ཙམ་འདས་མིན་གཏིང་བརྗེད་དུ་སོང་བའི་ཤོད་ཚུལ་དེ། ལྷད་མེད་པའི་འཇིག་རྟེན་འདིར་ཁྱེད་ཀྱིས་བདག་ལ་བཅངས་པའི་ཆེས་ཐོག་མའི་ཕ་ལོའི་བརྩེ་འདང་དང༌། མྱི་ཡུལ་གྱི་དྲོ་སྐྱིད་སྣུམ་པོ་ཤ་སྟག་ཡིན་ལ། འོ་ཞུན་ལས་དྭངས་བའི་ཕ་བུའི་དུང་ཀ་ཟབ་མོ་དག་དཀར་ཞིང་གཙང་བའི་ཁ་བའི་འདབ་མ་དང་ལྷན་དུ། ངའི་ཁོར་ཡུག་གང་སར་དལ་བུར་བབས་པའི་ངོ་མཚར་གྱི་བཙས་སྟོན་དེ་ནི་ཇི་འདྲའི་དྲན་འོས་པ་ཞིག་རེད་ཨང༌། དེ་ལས་མང་། »

ས་རུབ་དུས་ངས་ཁོ་མོ་དྲན་འོངས་ཤིང༌།
རྨི་ལམ་གྱི་ཞིང་དུ་རྟག་ཏུ་ཁོ་མོའི་རྒྱབ་གཟུགས་མངོན་པས།
བརྩེ་འདང་གི་སྲད་བུར་བསྟར་བའི་འཛུམ་ཀོང་རེ་རེ།
མེ་ཏོག་ལྟར་ཡིད་འོང་གི་ངང་ཚུལ་དུ་བཞད།

ཟླ་ངོགས་ཀྱི་དྲན་འཆར་ཐོར་བུ།
སྙན་ངག་དང་མིག་ཆུའི་མཚེའུར་འཁྱིལ་ཞིང༌།
བསིལ་རླུང་གི་ཤུགས་བསྟན་ཁྲོད་འཕུར་ཀྱིན་པའི་ཁེར་ཟླ།
དོ་ནུབ། ངའི་ལས་དབང་གི་འགྲེལ་སྟངས་དམར་སྐྱ་དེ་མིན་ནམ་སྙམ།

མཚན་གུང་གི་བསམ་གཞིག་རིང་པོ།
བར་སྣང་གི་ཕོ་བྲང་ན། གཙང་ཆབ་ལྟར་བཞུར་དུས།
ཉི་མའི་དབྱངས་རྟ་དང༌། དུས་ཚིགས་གཞན་ཞིག་གི་ཆོ་ལོ།
བརྩེ་དུངས་ཀྱི་བརྙས་བཅོས་ཡིན་ངེས།

སྐར་མདའ་གཅིག་ཤེད་ཀྱིས་ཕྱུང་བ།
ལས་འཕྲོ་ཞིག་སིལ་བུར་འཐོར་བའི་བརྡ་རུ་གོ་ན།
ལོ་དེའི་སྟོན་ཁར།
ངང་མོ་ཟུང་ཕྱོགས་ཕྱོགས་སུ་འཕུར་དགོས་པ་མཐོང༌།

དབེན་ཐང་ཐང་གི་ལུང་ཁུག་དེ་ནས།
མི་ཚེ་ལས་དཀའ་སྡུག་རིང་པའི་ལོ་ཟླ་སྲིང་སྐབས།
ཆར་རླུང་དང་སྨུག་རྒྱུ་འཐབ་པའི་ལ་རྩེ་ན།
ཁྱེད་ཀྱི་ལང་ཚོར་དར་ལྕོག་གིས་འཕྱ་བརྙས་བྱེད།
གྲང་ངར་གྱི་མདུན་དུ་མེ་ཐབ་ལ་གཅེས་ཤིང༌།
ཁེར་རྐྱང་གི་ནམ་ཟླ་སི་གླུ་ལ་གཡེང༌།
ད་དུང༌། མཚན་མོ་མང་པོ་ཞིག་གི་མིག་ཟུང་སྒྲིམ་ཏེ།
རི་སྤྱང་ལ་རྐང་ལག་འཇབ་ཀྱིན།
བྱ་གླག་གི་གཤོག་སྒྲར་བླག་གིན།
སྐར་ཚོགས་ཀྱི་ལས་དབང་ལ་འཁྲེང་སེམས་ལྕི་བས།
ངག་རྒྱུན་གྱི་རི་ཉག་དེ་རུ།
ཀི་རིང་དང་འུར་ཆ་བརྡེགས་པའི་སྒྲས།
གཞིས་བདག་གི་རྨི་ལམ་དཀྲོག
སྣུམ་སྣུམ་ཤིག་ཤིག་གི་སྤང་ལྗོངས་ངོགས་སུ།
མེ་ཏོག་ལས་མཚར་བའྀ་བུ་མོ་གཅིག་གིས།
སྤང་རྒྱན་མེ་ཏོག་གི་ངང་ཚུལ་གླེང་རུང༌།
ཡང་བསྐྱར་གྱི་དུས་ཚིགས་ལ།
ཟླ་བ་མེད་ན་ཤ་ཟན་ཤིན་ཏུ་མང་བས་་་་་་་་

དྲི་མེད་ཞོ་གསར་སྤྲིན་གྱི་ཁྲི་འཕང་ན་འགྱིངས་པའི།།
ཚངས་པའི་བློ་ལ་ཅོ་འདྲི་དགྲ་བཅོམ་གྱི་རྒྱལ་པོ།།
ལས་དང་རྒྱུ་འབྲས་ཁས་ལེན་བྱེད་མུས་ཤིག་ཡིན་རུང༌།།
ཁོ་བོ་སེམས་ནད་མལ་ལས་ཐར་དུས་ཤིག་མི་འདུག།

ཡ་གིའི་དཀོན་མཆོག་གསུམ་ལ་དད་མཆོད་ཀྱི་བཀུར་དང༌།།
མ་གིའི་ངན་སློང་དག་ལ་སྦྱིན་པ་རང་སྩལ་རུང༌།།
འཚོ་གནས་ངལ་བས་ལུས་པོའི་ཟུངས་བཅུད་ཀུན་ཉམས་པའི།།
རྒྱུ་འབྲས་ཆ་མི་སྙོམས་པའི་ལས་དབང་དེ་གང་ཡིན།།

མཐོང་བ་དོན་ཡོད་བྱམས་ལྡན་ཕ་མ་ཡི་བསླབ་བྱ།།
མ་ཉན་ཁོང་ནས་རྒོལ་བའི་པྲ་ཚག་ལ་འབད་པས།།
ཕོ་རྒོད་དར་མའི་ལ་རྒྱ་གཞན་དབང་དུ་བསྐྱལ་དགོས།།
འཁོར་བའི་རྣམ་སྨིན་མིན་པའི་གཏན་ཚིགས་དེར་སུས་འགྲེལ།།
དེ་ལས་མང་། »

བྱ་དོར་ཕུན་ཚོགས་དབང་ཕྱུག

ཀོ་ནག་བཏིངས་བ་དང་འདྲ་བའི་ནམ་མཁའ་རལ་བོ་དེའི་འོག་ཏུ།
གློག་དམར་དང་འབྲུག་སྒྲ་ཡིས་འདར་ཡོམ་འཁྱིལ་ཞིང༌།
རླུང་འཚུབ་དང་ཆར་དྲག་གི་རྒྱུ་བ་རྒོད་རུང༌།
ཁྱོད་རང༌། ཅིའི་ཕྱིར་རང་དབང་གི་དཔལ་འབར་མཐོ་ནས་མཐོ་རུ་འགྲེངས་ཏེ།
སྨག་རུམ་དང་འཇིགས་སྐྲག་གི་མཚན་སྟུག་ལ་རྒོལ།
ཚེ་སྲོག་དང་ཐ་སྙད་བསྲེགས་པའི་ཡུལ་གྲུ་དེར།
མཐའ་དམག་གི་འཇབ་རྒོལ་ཕོག་ཉིན་ནས་བཟུང༌།
གནས་དེའི་ཉི་ཟླར་གཟི་མདངས་བརླགས་ཤིང༌།
ཕོ་བྲང་དཀར་པོ་དང་དམར་པོ་ཡང༌།
འགད་རྫས་ཀྱི་རྡུལ་སྨུག་ཁྲོད་དུ་ཡུན་རིང་ནས་ཡུན་རིང་མི་མངོན་པའི་དབྱིངས་སུ་སྤུར།
དེ་ལས་མང་། »

དབྱར་ཁ་སོང་ཤུལ་དུ།
སྟོན་ཁ་སྔར་བཞིན་སྐྱོ་ལྷང་ལྷང༌།
ལྷེབ་ལྷེབ་ཏུ་ཟགས་པའི་ཤིང་ལོ་རྣམས།
གྲང་རླུང་གི་ཟོམ་ཁ་ན་རྒས།

ལོ་འདབ་རེ་རེ་ཆུ་གཉེར་དང་འགྲན་ཞིང༌།
གཙང་པོའི་མཁའ་ངོགས་སུ་གཉོམ་གདུང་ངང་འཁྱེར་དུས།
དུས་རབས་ཀྱི་རླབས་རྒྱུན་ཁྲོད་ཀྱིན་པའི།
ང་ཚོའི་མི་རིགས་དང༌། རིག་གཞུང༌།
ལེགས་བྱང༌། ད་དུང་་་་་་་་་༌།
དེ་ལས་མང་། »

བྱ་དོར་ཕུན་ཚོགས་དབང་ཕྱུག

གྲང་ཤུར་ཤུར་གྱི་རླུང་བུ་ལྡང་བའི་ནངས་མོར།
འཁྱག་སིབ་སིབ་ཀྱི་ཁ་བ་འབབ་པའི་ཞོགས་ཀར།
མིག་ཆུ་ལས་སྐྱུར་བའི་ཕྲིན་པ་མག་མོག་ཅིག་དང༌།
ཨག་སྐད་ལས་འཛེར་བའི་སྐད་ངག་རལ་བོ་ཞིག་གིས།
ངའི་སེམས་ཁམས་རྒྱ་མཚོའི་རྦ་རླབས་ལྟར་དཀྲུག་ཅིང༌།
ཁྱེད་ཀྱི་མི་ཚེ་རླུང་ཁའི་མར་མེ་ལ་སྒྲོན།
བདེན་ཏེ། ངེས་དོན་གྱི་སྤྲུལ་སྐུ་ལགས།

ཕ་མེས་ཀྱིས་ཞབས་རྗེས་དཔར་བའི་རྒྱང་རིང་གི་ཞིང་ཁམས་དེ་ན།
དུས་རབས་ཀྱི་སྨག་རུམ་སྟུག་པའི་གངས་ལྗོངས་ཀྱི་ས་གཞིའི་ངོས་སུ།
ཁྱེད་ཀྱི། འཚོལ་སྙེག་གི་སྤོབས་པ་དང་བདེན་དོན་གྱི་གླུ་སྒྲ་སྙན་མོས།
ང་ཚོའི་དགུན་ལྗོངས་ལ་དཔྱིད་དཔལ་གྱི་ལང་ཚོ་སྣོན་ཞིང༌།
ཁྱེད་ཀྱི། ཞུམ་མེད་ཀྱི་སྙིང་སྟོབས་དང་ཟླ་མེད་ཀྱི་ལ་རྒྱ་ཟབ་མོས།
ཡུན་རིང་བག་ལ་ཉལ་བའི་མི་རིགས་དེའི་བསམ་པའི་སྒོ་གླེགས་དཀྲོགས།
དེ་ལས་མང་། »

དགུན་རླུང་གི་གྲང་རེག་ལས་སྐྱེན་པའི་ཚོར་འདུ་ཞིག
སྨུག་སྤྲིན་ལྟར་ངའི་འདུ་ཤེས་ཀྱི་ཟབ་ས་ནས་ལང་ལོང་དུ་འཕྱུར་དུས།
རྣོ་ལྕགས་ཀྱི་གཙབ་རྡུང་ལས་ལྕི་བའི་ན་ཟུག་དེས།
བདག་གི་བློ་མཆིན་གྱྀ་གཏིང་རིམ་གང་སར་འཁྱོམ་འགུལ་ཐེངས་ཤིག་བསླངས།

མེ་ཏོག་རྡོ་ཆར་གྱིས་བཅོམ་པའི་ལོ་ཟླ་ཟད་པོར།
ཁྲག་ནག་དང་བརླན་གཤེར་འཐབ་པའི་ཆུ་རུལ་ཟམ་མི་ཆད་པས།
ངའི་སྒོ་ཁ་རུ་སྡུག་བསྔལ་གྱི་ཕ་བོང་དུ་མ་ཚེར་ཕུང་ལྟར་གཟེངས་ཤིང༌།
མཐོ་སྒང་ན་བེམ་རོ་ལས་གསོན་སྲོག་གི་སྣང་བརྙན་གཏན་དུ་བྲལ་ཟིན་ཟེར།

འཇིག་རྟེན་གྱི་གསང་མིག་ཆུང་ཆུང་དག་གི་སེར་སྲུབས་ལས།
སུ་ཞིག་གི་མིག་ཆུ་ཁྲག་ཏུ་བཞུར་བའི་རྨི་ལམ་གསོན་པོ།
ཕ་མེས་ཀྱི་དུར་ཐང་སྲུང་བའི་གཉེན་པོར་འདོད་རུང༌།
སྲོད་དུས་ཀྱི་ཡུལ་ལྗོངས་ལ་བསླུ་བྲིད་ཀྱི་རྒྱབ་གཟུགས་སྦྲུམ་ཡོད་པས།
ཁ་བ་ལས་གྲང་བའི་སྙིང་གཏམ་ཡོད་ཚད་གནས་སྐབས་སེམས་ལ་སྦ་རོགས།
དེ་ལས་མང་། »

མི་རིགས་ཀྱི་བླ་སྲོག་ཏུ་གྱུར་པའི་མི་བུ་ཞོགས་དུང་དང༌། ཞོགས་ལྗང༌། ཐེའུ་རང་བཅས་རྒྱ་དམར་གྱིས་བཀག་འཇུག་བྱས་པར་གདུང་སེམས་མཚོན་བྱེད་དུ།

ཉིན་བྱེད་མཁའ་མཐར་ལྷུང་བའི་མཐོ་སྒང་གི་གཡང་ཁྱིམ།།
སྨག་གི་གཤེད་ཚོགས་གཏུམ་མོས་འཁྱུར་མིད་དུ་གཏོང་དུས།།
དམར་ནག་རྒྱ་འདྲེ་སྨྱོས་པའི་གདུག་རྩུབ་ཀྱི་བྱེད་ལས།།
རིགས་པའི་ཁྱེའུ་བཅོམ་པའི་ཆོ་འཕྲུལ་དུ་བཀྱེད་བྱུང༌།།

སྲིད་པའི་རྒན་མོ་ངུས་པའི་ལྟས་ངན་གྱི་ཆོ་ངེས།།
མིག་ཟུང་ཁྲག་ལ་རྔམ་པའི་བྱ་རྒོད་དེ་འདྲོགས་པས།།
རོ་ལངས་དངན་པ་འཆོར་བའི་དུར་ཁྲོད་ཀྱི་ཐང་ན།།
ཕྱིར་མིག་བོད་ལ་ཅེར་བའི་རྣམ་ཤེས་དེ་སུ་རེད།།

མ་དག་སྣང་བ་སྐྱོང་བའི་བླུན་ནག་གི་ཁོར་ཡུག།
གཡོ་སྒྱུའི་ཞགས་ནག་འོག་ཏུ་དབུགས་རྒྱུ་དེ་གཞོམ་པས།།
འཇིགས་རུང་རླུང་དམར་འཚུབ་པའི་ཁྲོ་སྐད་ཀྱི་དབུས་སུ།།
གངས་ཀྱི་སེང་གེ་འདར་བའི་ངང་ཚུལ་དེ་མཐོང་ངམ།།

རླུང་དང་སྐྱི་བསེར་འཐབ་པའི་རྔམ་སེམས་ཀྱི་བར་ན།།
སྟོན་གྱི་འདབ་ལོ་སེར་པོས་སྐྱོ་གླུ་ཞིག་བླངས་ཐལ།།
ལས་དང་རླུང་རྟ་རྒུད་པའི་ཆག་སྒོ་ཡི་ཁྲོད་དུ།།
མི་གཞིའི་སྙིང་སྟོབས་སྤོར་བའི་ཞོགས་དུང་དེ་བརླགས་ཐལ།།
དེ་ལས་མང་། »

ས་བདག་འབྱུང་པོ་ཁྲོས་པའི་རྔམ་སེམས་ཀྱི་མཆེ་རྩེ།
སྐྱེ་རྒུའི་སྲོག་ཐག་གཅོད་པའི་སྒྱོགས་རྡོ་རུ་འགྲིལ་བས།
རྒྱུ་འབྲས་རྨི་ལམ་ཞིང་དུ་ཡིད་ཆེས་ཀྱིས་གཉིད་པའི༌།
ང་ཡི་སྤུན་ཟླའི་ལས་དབང་འདི་འདྲ་ཞིག་ཡིན་ནམ།

བརྩེགས་པའི་ཁང་ཁྱིམ་སྲོག་གཅོད་རྦབ་རྒོད་དུ་སྒྱུར་ཅིང༌།
བསགས་པའི་རྒྱུ་ནོར་རྡུལ་ཕྱེའི་འཚུབ་མ་ཡིས་བརྐུས་ཤིང༌།
གཅེས་པའི་ལུས་སྲོག་སྐད་ཅིག་དེ་ཉིད་དུ་བརླགས་པའི།
མི་ཡུལ་ཆག་སྒོ་དེ་ལ་བཟློག་ཐབས་ཤིག་གནོངས་དང༌།

རྣོ་ལྕགས་ཨར་འདམ་འཐབ་པའི་ཚེར་མདུང་གི་དབུས་སུ།
ཚེ་སྲོག་སྟོང་ཕྲག་བརྡབས་པའི་རུས་ཐལ་དེ་འཕྱུར་བས།
ཅེ་སྤྱང་རྔམ་སེམས་རྒོད་པའི་འཇིགས་རུང་གི་རྨི་ལམ།
མུན་ནག་མཚན་ཧྲུལ་དེ་ཡིས་ཆོ་འཕྲུལ་ཞིག་མིན་ནམ།

ལུང་གཞུང་ངུ་སྒྲས་ཁེངས་པའི་སྐྱི་གཡའ་དང་ལྷན་དུ།
ས་གཞི་ཁྲག་གིས་གཤེར་བའི་དམར་མདངས་ཤིག་སྐྱོམ་པས།
གནམ་སའི་སྐྱི་ལྤགས་དབྲལ་བའི་ལྟས་ངན་ལ་གཞིགས་ན།
ཡོད་ཚད་བོད་ལ་སྡང་བའི་ཟློས་གར་ཞིག་ཨེ་ཡིན།
དེ་ལས་མང་། »